न्युज टाईम्स टिभी डेस्क – जनकपुरधाम , २०८२ साउन ३० गते।
नेपाल पत्रकार महासंघ, मधेश प्रदेश समितिले जनकपुरमा पत्रकारमाथि भएको आक्रमणको विरोधमा प्रधानमन्त्रीलाई ज्ञापनपत्र बुझाएको छ।
जनकपुरमा साउन २७ गते आयोजित पत्रकार सम्मेलनका क्रममा नेपाल बार एसोसिएसनका केही अधिवक्ताहरूको समूहले पत्रकारमाथि आक्रमण गरेको भन्दै दोषीमाथि तत्काल कारबाहीको माग गरिएको हो।
महासंघका अध्यक्ष श्याम बन्जारा र धनुषा शाखा अध्यक्ष पुरन साहद्वारा हस्ताक्षरित ज्ञापनपत्रमा घटनाले प्रेस स्वतन्त्रता र लोकतान्त्रिक मूल्यमा गम्भीर प्रहार भएको उल्लेख छ।
महासंघको भनाइअनुसार, श्रीराम गुठीको स्वामित्वमा रहेको चार कठ्ठा जग्गा भवन निर्माणका लागि लिजमा लिई तारबार लगाउने क्रममा अधिवक्ताहरूको समूहले पार्किङको नाममा कब्जा गर्ने प्रयास गर्दै हुलदंगा र आक्रमण गरेका थिए।
आक्रमणमा महासंघ अध्यक्ष बन्जारा, उपाध्यक्ष ज्योति झा, महासचिव शैलेन्द्र महतो, सञ्चारकर्मी दिवाकर राय, अनिलकुमार निराला र बिनिता यादव घाइते भएका छन्। दिवाकर रायको अवस्था गम्भीर छ भने महतोको खुट्टा दुई ठाउँमा भाँचिएको छ। साथै, महिला पत्रकारमाथि अभद्र व्यवहार र आपत्तिजनक शब्द प्रयोग गरिएको आरोप छ।
घटनापछि स्थानीय प्रशासन र प्रहरीमा उजुरी दिए पनि अहिलेसम्म कुनै दोषी पक्राउ नपरेको भन्दै महासंघले प्रहरीको भूमिकामाथि प्रश्न उठाएको छ।
महासंघले घटनामा संलग्न सबैलाई तत्काल पक्राउ गरी निष्पक्ष छानबिन र कडा कारबाही गर्न तथा प्रेस स्वतन्त्रताको रक्षार्थ प्रभावकारी कदम चाल्न माग गरेको छ।
