न्युज टाईम्स टिभी डेस्क, महोत्तरी, असार १० –
महोत्तरी जिल्लाको पिपरा गाउँपालिकाले आर्थिक वर्ष २०८२/८३ का लागि कुल रु ५३ करोड ५१ लाख ४५ हजार ३०६ को बजेट सार्वजनिक गर्दै १५औँ गाउँसभा मंगलबार सम्पन्न गरेको छ ।
सभामा पिपरा गाउँपालिकाकी उपाध्यक्ष वन्दना पाण्डेयले नीति, कार्यक्रम तथा बजेट प्रस्तुत गरेकी थिइन् भने सभाको अध्यक्षता गाउँपालिका अध्यक्ष राम जानकी यादवले गरेको थियो।
कार्यक्रममा पूर्व कृषि मन्त्री हरिनारायण यादव प्रमुख अतिथिका रूपमा सहभागी भएको थियो ।
पिपरा गाउँपालिकाको आगामी वर्षको बजेट उपाध्यक्ष पाण्डेयले सार्वजनिक गरेकी थिइन् । प्रस्तुत बजेटमा शिक्षा स्वास्थ्य, कृषि, पूर्वाधार विकास र रोजगारी सिर्जना जस्ता जनजीविकासँग प्रत्यक्ष सम्बन्धित क्षेत्रहरूलाई प्राथमिकता दिइएको छ।
समावेशी विकास र सामाजिक न्यायलाई केन्द्रमा राख्दै, गाउँपालिकाको समग्र विकास गर्ने उद्देश्यले बजेट र कार्यक्रम तयारी गरिएको उपाध्यक्ष पाण्डेयले जानकारी दिइन् ।
सभामा अध्यक्ष यादवले सम्बोधन गर्दै भने:”पिपरा गाउँपालिका विकासका कामहरू तीव्र गतिमा अगाडि बढिरहेका छन्। हामी सबै मिलेर यसलाई नमूना पालिका बनाउनेछौं।”
उनको अनुसार, पिपरा जनता अस्पतालमा अधिकांश स्वास्थ्य सेवा तथा सुविधा उपलब्ध गराइएको, विद्यालयहरूमा पठनपाठनको व्यवस्था पनि सुदृढ भइरहेको र बाँकी रहेका कमजोरीहरू आगामी वर्षमा सुधार गरिने भएको छ ।
आगामी वर्षको नीति तथा कार्यक्रममा सार्वजनिक गर्दै स्थानीय उत्पादनमा आधारित रोजगारी सिर्जना, कृषि यान्त्रिकीकरण, शिक्षा र स्वास्थ्यमा गुणस्तर वृद्धि, सडक तथा खानेपानी पूर्वाधारको सुदृढीकरण जस्ता विषयलाई प्राथमिकतामा राखिएको उनले उल्लेख गरे ।
गाउँसभामा वडाध्यक्षहरू, राजनीतिक दलका प्रतिनिधिहरू, स्थानीय कर्मचारी, सुरक्षाकर्मी, र सर्वसाधारणको उल्लेखनीय उपस्थिति रहेको थियो।
