जनकपुरधाम । धनुषाको मिथिला बिहारी नगरपालिका–३ मिथिलेश्वर मौवाहीस्थित सहिद चन्देश्वर मण्डलको २०औँ स्मृति सभामा आइतबार बोल्दै नेपाल कम्युनिष्ट पार्टी (माओवादी केन्द्र) की उपाध्यक्ष पम्फा भुसालले प्रधानमन्त्री केपी शर्मा ओली नेतृत्वको सरकार सुशासन विरोधी भएको दाबी गरिन् ।
नेतृ भुसालले भूमि सम्बन्धी कानुन, निजामति ऐन, शिक्षा विधेयकजस्ता विषयमा सरकारले अघि सारेको नीति संघीयता र समावेशी लोकतन्त्र कमजोर बनाउने खतरा रहेको उल्लेख गरिन् । गठबन्धनको वर्तमान सरकारले भ्रष्टाचार प्रवद्र्धनमा लागेको उनले आरोप समेत लगाएकी छिन् । संविधान विपरीतका निर्णयले संघीय कार्यान्वयनमै अवरोध सिर्जना भएको उनको भनाइ थियो । साथै,भुसालले नेकपा एकीकृत समाजवादी, विप्लव समूह, जनता समाजवादी पार्टी लगायतसँग पार्टी एकीकरणका विषयमा सकारात्मक वार्ता भइरहेको जानकारी समेत दिइन् ।
विशिष्ट अतिथि पार्टीका केन्द्रीय उप महासचिव तथा मधेस प्रदेश इन्चार्ज मातृकाप्रसाद यादवले सहिदहरूको योगदान स्मरण गर्दै पार्टीभित्रको गुटबन्दी हटाई एकता कायम गर्नुपर्नेमा जोड दिए ।
कार्यक्रममा सहिद परिवारलाई सम्मान गरिनुको साथै आयोजित रक्तदान कार्यक्रममा ४५ जना सहभागी भएका थिए ।
कार्यक्रममा पार्टीका केन्द्रीय सदस्य श्रावण बरवरिया यादव, जिल्ला संयोजक दिपक यादवलगायत नेताहरूको उपस्थिति थियो । अध्यक्षता नगर अध्यक्ष प्रदीप नारायण साहले गरेका थिए भने सञ्चालन नगर सचिव एवम् वडा अध्यक्ष संजय शर्माले गरेका थिए ।
