न्युज टाइम्स टिभी डेस्क – जनकपुरधाम, ३ भदौ २०८२, मंगलवार।
रौतहटको गौर हत्याकाण्डसम्बन्धी सर्वोच्च अदालतको आदेशविरुद्ध जसपा नेपाल औरही गाउँपालिका समितिले मंगलवार ईलाका प्रहरी कार्यालय औरही-हैरसहा नजिक टायर बालेर आन्दोलन गरेको छ।
आन्दोलनकारीहरुले “निर्दोषलाई फसाउन पाइदैन”, “राज्यसत्ताको दुरुपयोग बन्द गर”, “गौर घटना षड्यन्त्र हो, योजनाकारलाई कारबाही गर” जस्ता नारासहित प्रदर्शन गरेका थिए।
जसपा नेपाल जिल्ला उपसचिव विकास यादवले भुमि अध्यादेशका विषयमा चट्टानी अडानमा रहेका अध्यक्ष उपेन्द्र यादवलाई एमाले र कांग्रेसले मिलेर राजनीतिक षड्यन्त्र गरी फसाउन खोजेको आरोप लगाए। उनका अनुसार, गौर घटनालाई तत्कालीन माओवादीको हिंसात्मक गतिविधिको उपज भन्दै त्यसको दोष अन्यत्र थोपर्ने प्रयास भइरहेको छ।
यसैबीच, राजधानी काठमाण्डौमा पनि जसपाले सर्वोच्चको आदेशविरुद्ध मसाल जुलुस निकालेको छ। सो क्रममा तीन सांसदसहित डेढ दर्जनभन्दा बढी नेता–कार्यकर्तालाई प्रहरीले नियन्त्रणमा लिएको बताइएको छ।
जसपा नेपालले आज पालिका स्तरीय आन्दोलन सञ्चालन गरेको र यसलाई चरणबद्धरूपमा विस्तार गर्ने जनाएको छ।
