न्युज टाईम्स टिभी डेस्क – जनकपुरधाम४ भदौ २०८२, बुधवार
जनता समाजवादी पार्टी (जसपा) नेपाल धनुषाद्वारा जनकपुरधाममा प्रधानमन्त्री केपी शर्मा ओलीको पुतला दहन गर्दै विरोध प्रदर्शन गरेको छ । विरोध प्रदर्शन कार्यक्रमका क्रममा भएको झडपमा दुई जना युवा नेता घाइते भएका छन्।
बुधबार जनकपुरधाम स्थित भानु चौक (रमेश चौक)मा प्रदर्शनकारी र प्रहरीले बल प्रयोग गरेपछि जसपाका युवानेता सुरज महतो र पुण्यप्रसाद पटेल घाइते भएको हो । घाइते महतो र पटेललाई तत्काल जनकपुरस्थित धनुषा अस्पताल र मधेश स्वास्थ्य विज्ञान प्रतिष्ठानको प्रादेशिक अस्पतालमा प्रारम्भिक उपचार गराइएपछि थप उपचारका लागि जानकी हेल्थ केयर अस्पतालमा भर्ना गरिएको माजवादी युवा संघ नेपाल,मधेस प्रदेशका मुख्यसचिव दिपेन्द्र कापरीले जानकारी दिए।
जसपाले उक्त घटना ‘राजनीतिक प्रतिशोधका आधारमा गरिएको कदम’ भन्दै तत्काल परमादेश फिर्ता गर्न माग गरेको छ। सोही क्रममा जसपाका केन्द्रिय सदस्य माननीय रामअशिष यादवले सरकारको सहमतिमै १९ वर्षपछि गौर हत्याकाण्डको छानविन गर्न सर्वोच्च अदालतले परमादेश जारी गरेको र सरकारले जसपामाथि आक्रमणको प्रयास गरेको जनाउँदै मधेश आन्दोलन गर्ने चेतावनी दिए।
गौरकाण्डको छानबिन गर्न सर्वोच्च अदालतबाट गएको सोमबार परमादेश जारी भएको छ। २०६३ साल चैत्रमा रौतहटको गौरमा तत्कालीन मधेशी जनअधिकार फोरम नेपाल र नेकपा माओवादी पार्टीका कार्यकर्ताबीच झडप भएको थियो। सो क्रममा २७ जना माओवादी पक्षका मानिसको मृत्यु भएको थियो।
यता, जसपा नेपाल धनुषाले २०६३ चैतमा रौतहटको गौरमा घटेको नरसंहार घटनामा सर्वोच्च अदालतले हालै अनुसन्धान अघि बढाउन परमादेश जारी गरेपछि त्यसको विरोधस्वरूप आन्दोलन थालेको थियो। सोही क्रममा प्रहरीले प्रदर्शन रोक्न बल प्रयोग गर्दा झडप हुन पुगेको जनाइएको छ।
