न्युज टाईम्स टिभी डेस्क – जनकपुरधाम, ११ भदौ २०८२, बुधवार
जनकपुरधाम उपमहानगरपालिका–२१ कुर्थामा नयाँ हुलाक काउन्टर स्थापना गरिएको छ। स्थानिय नागरिकलाई हुलाक सेवामा सहजता र सुविधा पुर्याउने उद्देश्यले काउन्टर सञ्चालनमा ल्याइएको हो।
नवस्थापित हुलाक काउन्टरको उद्घाटन समारोहमा हुलाक सेवा निर्देशालय, मधेस प्रदेशका निर्देशक जगदीश अर्यालको उपस्थिति रहेको थियो। कार्यक्रममा स्थानीय जनप्रतिनिधि, समाजसेवी, सरोकारवाला निकायका प्रतिनिधिहरू तथा स्थानियवासीहरूको सक्रिय सहभागिता थियो।
उद्घाटन कार्यक्रममा निर्देशक अर्यालले भने ग्रामीण क्षेत्रमा हुलाक सेवा अझ प्रभावकारी र आधुनिक बनाउन यो काउन्टर महत्वपूर्ण हुने बताउनुभयो। उहाँका अनुसार यस काउन्टर मार्फत पत्राचार सेवा, दर्ता हुलाक, पार्सल ,बिमा सेवाहरू सहज रुपमा उपलब्ध हुनेछन्।
त्यस्तै, जनकपुरधाम–२१ कुर्थाका वडा अध्यक्ष राजनारायण शाहले हुलाक काउन्टरको स्थापना हुदा वडा क्षेत्रमा संचार सेवा, सरकारी तथा गैरसरकारी पत्राचार र सामान आदान–प्रदानलाई थप सहज बनाउने विश्वास व्यक्त गर्नुभयो। उहाँले स्थानियवासीको सहयोग र सहभागितामा वडाको समग्र विकास सम्भव हुने उल्लेख गर्दै आगामी दिनमा अझ थप सेवामूलक कार्य अघि बढाइने प्रतिबद्धता पनि व्यक्त गर्नुभयो।
स्थानीय समाजसेवी हरि शाहले भने हुलाक काउन्टर स्थापना भएपछि सेवाहरू लिन टाढासम्म धाउनुपर्ने बाध्यता अन्त्य हुने भन्दै खुशी व्यक्त गरेका छन्।
